ဘယ်လောက်ပဲ ကောင်းတဲ့အလုပ်ကို လုပ်တယ်လို့ပြောပြော
ကိုယ်လုပ်လိုက်တဲ့ လုပ်ရပ်ဟာ လူ့တစ်ဖက်သားကို နစ်နာစေမယ် ထိခိုက်စေမယ်ဆိုရင်
ကောင်းတဲ့အလုပ် ကုသိုလ်လို့ မခေါ်နိုင်ပါဘူး။
ကုသိုလ်ဆိုတာ ကုသလာ အန၀ဇ္ဇ သုခ ၀ိပါကလက္ခဏာဆိုတဲ့အတိုင်း
လောကအပြစ် သံသရာအပြစ်မရှိတဲ့တရား
ကောင်းသောအကျိုးကိုပေးတတ်တဲ့တရားကိုသာ ကုသိုလ်လို့ခေါ်တာပါ။
-----------------------------------------------------------------------------------------------------------------------
သဒ္ဓါ=ပညာ ညီမျှပါ
ယုံကြည်မှုတွေ သိပ်များပြီး အသိဥာဏ်နည်းပါးရင် မယုံသင့်တာတွေကို ယုံတတ်တယ်။
ဒါကြောင့် အသိဥာဏ်ရှိအောင်လုပ်ပါ။စာဖတ်ပါ။လေ့လာပါ။
သူ့ကရဟန်းပဲ သူကဘွဲ့ရပညာတတ်ပဲ သူပြောတာတော့ မှန်လောက်ပါတယ်လို့တွေးပြီး မယုံလိုက်ပါနဲ့။
ကိလေသာမကင်သေးတဲ့လူသားတိုင်း အမှားကိုယ်စီရှိသလို အားနည်းချက်ကိုယ်စီရှိကြပါတယ်။
တခါတလေ ကိုယ်သိပ်အထင်ကြီးတဲ့လူတွေက ကိုယ့်လောက်မသိတာတွေရှိတတ်ပါတယ်။
----------------------------------------------------------------------------------------------
ကိုယ်သာသနာ တကယ်တိုးတတ်စေချင်ရင်
သူ့တစ်ပါးကို လိုက်ပုတ်ခက်နေစရာမလိုဘူး။
ကိုယ့်အလုပ် ကိုယ်လုပ်ဖို့ပဲလိုတာ။
ကိုယ့်အလုပ် ကိုယ်လုပ်တဲ့လူကို အများကလည်းလေးစားတယ်။
ဂုဏ်သိက္ခာလည်းရှိတယ်။
-----------------------------------------------------------------------------------------------
ဘယ်လိုလူကို ပေါင်းရမှာလဲ ?
ဘ၀အောင်မြင်ရေး လမ်းကြောင်းကို လျောက်လှမ်းကြသူတိုင်း မိတ်ဆွေစစ် မိတ်ဆွေမှန်ဆိုတာ မရှိမဖြစ် လိုအပ်သော ခွန်းအားတစ်ခု ဖြစ်ပါသည်။
ဒါကြောင့်လည်း မိတ်ဆွေစစ် မိတ်ဆွေမှန်ကို ပေါင်းသင်းရခြင်းကြောင့် ကိုယ့်ဘ၀အတွက် အကျိုးတစ်ဝက် ပြီးစီးစေတယ်လို့ အရှင်အာနန္ဒာရဲ့ လျောက်ထားတဲ့စကားကို ပါယ်မြစ်ပြီး မိတ်ဆွေစစ် မိတ်ဆွေမှန်ကို ပေါင်းသင်းရခြင်းကြောင့် ကိုယ့်ဘ၀အတွက် အကျိုးအပြည့်အစုံ ပြီးစီးစေတယ်လို့ မိတ်ဆွေကောင်းတွေရဲ့ ကျေးဇူးကြီးပုံကိုလည်း ဘဂ၀ါဘုရားက ဖော်ညွန်းခဲ့သေးသည် မဟုတ်ပါလော။
ထိုကြောင့် ဘ၀မှာ ပြီးပြည့်စုံသော အောင်မြင်သူတစ်ယောက်ဖြစ်ဖို့ မိတ်ဆွေကောင်းကို ပေါင်းသင်းတတ်ဖို့သည် အရေးကြီးသောလိုအပ်ချက်ဖြစ်ပေ၏။
မိတ်ဆွေကောင်းဟူသည် အဘယ်နည်း ?
တစ်ခုသော တောအုပ်အတွင်း၌ ဘုရာလောင်းရသေ့ကြီးနှင့် သူ့၏ သားငယ် ရသေ့တို့ တရားဘာဝနာပွားများကာ အတူတကွနေကြလေ၏။
ထိုသို့ နေထိုင်လေရာ တနေ့တွင် အမျိုးသမီးငယ်တစ်ယောက် ရောက်လာပြီး ရသေ့ငယ်ကို ဖြားယောင်ကာ သီလဖျက်စီးစေ၍ မိမိအပေါ်၌ အစွဲလန်းကြီးစွဲလန်းစေ၏။
ရသေ့ငယ် မိမိဘက် ပါမှန်းသိလျှင် အမောင် တောမှာ နေရတာ အင်မတန် ပင်ပန်းဆင်းရဲတယ်။မြို့သို့ လိုက်ခဲ့ပါ။မြို့မှာဆို တို့ချမ်းချမ်းသာသာ နေကြရမှာ။ဒီမှာလို မိုးရွာ မရှောင် နေပူမရှောင် သစ်သီးရှာစရာမလိုဘူး။ဟိုမှာ အာလုံးပြည့်စုံတယ်။ ကျမနှင့်အတူ မြို့သို့ လိုက်ခဲ့ပါလို့ ပြောဆို ပူဆာလေသည်။
ရသေ့ငယ်သည် မြို့သို့ တစ်ခါမှလည်း မရောက်ဖူး ဗဟုသုတကလည်း နည်းပါးသည့်အတွက် အမျိုးသမီးပြောတိုင်းယုံကာ ဖခင်ပြန်လာလျင် ဖခင်ကို ပြော၍ သင့်နောက် လိုက်ခဲ့မည်ဟု ပြောလေ၏။
အမျိုးသမီးငယ်သည် ရသေ့ကြီးနှင့် ရင်မဆိုင်ရဲ။ထိုကြောင့် ကျမ အရင်သွားနှင့်မယ်။ရှင်နောက်ကလိုက်လာခဲ့ရေ။ကျမ သွားတဲ့လမ်းမှာ အမှတ်အသား ထားခဲ့မယ်။ အဲဒါကို ကြည့်၍ လိုက်ခဲ့ဟု မှာကြားပြီး ထွက်သွားလေသည်။
ရသေ့ငယ်သည် အမျိုးသမီးငယ်ကို လွမ်းဆွတ်သတိရကာ တငိုင်ငိုင် တထွေထွေနှင့် ထင်းလည်းမသယ် ရေလည်းမခပ် ရသေ့ကြီး ပြန်လာလို့လည်း ခရီးဦးမကြိုဆိုပဲနေလေ၏။
ဖခင်ရသေ့ကြီးလည်း ရိပ်မိ၏။ထိုကြောင့် ချစ်သား သင်ဘာဖြစ်နေတာလဲ နေကောကောင်းရဲ့လား ဟုမေးလေး၏။ နေကောင်းပါတယ် ဖခင်။သားဒီတောထဲမှာ မနေချင်တော့ဘူး။ဒီတောထဲမှာ နေရတာ အင်မတန် ပင်ပန်းဆင်းရဲတယ်။သား မြို့ကိုပဲသွားတော့မယ်။သားရဲ့အဖော်ကလည်း ရှေ့က သွားနှင့်ပြီး စောင့်နေတယ်။မြို့ကို သွားခွင့်ပြုပါ။
နောက်ဆုံးအနေနဲ့ မြို့ရောက်လျှင် ဘယ်လို မိတ်ဆွေ မျိုးကို ပေါင်းသင်းရမလဲဆိုတာကိုပြောကြားဆုံးမပေးပါဟုတောင်းပန်လေ၏။ ရသေ့ကြီးလည်း ရသေ့ငယ် ပန်ကြားသော စကားကို ကြားလေလျင်
ချစ်သား သင့်ကို ချစ်သောသူ သင် ချစ်သည်ကို နှစ်သက်သောသူ သင့် စကားကို နားထောင်သောသူ သင့်ကို သည်းခံသောသူတို့ကို ပေါင်းလော။
ချစ်သား ကိုယ် နုတ် စိတ် သုံးပါးတွင် တစ်ပါးပါးဖြင့် ကောင်းမှုပြုသူကို မိဘအရင်းကဲ့သို့ ပေါင်းလော။
ချစ်သား ကောင်းသော အကျင့်စရိုက် ရှိ၍မာန်မာနမရှိသောပညာရှိကို ပေါင်းလော။
ချစ်သား လိုတစ်မျိုး မလိုတစ်မျိုးစိတ်ရှိသောသူ မျောက်စိတ်ကဲ့သို့ မတည်ကြည်သောသူ ချစ်လွယ်မုန်းလွယ်တတ်သောသူတို့ကို ဤလောက၌ ပေါင်းသင်းစရာ လူမရှိရင်တောင်မပေါင်းသင်းလေနှင့် ။
ချစ်သား မြွေဟောက်ကဲ့သို့ အမြတ်ထွက်သောသူကို အဝေးကပင် ရှောင်လော။
ချစ်သား လူမိုက်ကို ပေါင်းသူတို့အား အကျိုးမဲ့တို့သာ တိုးပွား၏။လူမိုက်ကို မပေါင်းသင့်။လူမိုက်ကို ပေါင်းခြင်းသည် ရန်သူနှင့် အမြဲနေရခြင်းနှင့်တူ၍ ဆင်းရဲခြင်းကို ဖြစ်စေ၏ဟု အဆုံးအမပေးလေး၏။
ရသေ့ငယ်လည်း ဖခင်၏ အဆုံးအမကိုကြားလေလျှင်
ဖခင် သင်လို ပညာရှိသော ပုဂ္ဂိုလ်ကို မြို့ရွာတွင် တွေ့မည်မဟုတ်။မြို့ရွာသို့ သွားရမည်ကို ကြောက်လှပါ၏။ဖခင်နှင့်ပင် နေတော့မည်ဟု ပြောဆို၏။
ရသေ့ကြီးလည်း သားငယ်ရသေ့အား ဆုံးမကာ ကသိုဏ်းပရိကံကို ညွန့်ကြား၍ သမထကို ပွားစေ၏။မကြာမီ ဈာန်အဘိညာဉ်သမာပတ်ကို ရ၍ သေလွန်သော် ဗြဟ္မာပြည်သို့ ရောက်ရလေ၏။
ဤကား မိတ်ဆွေစစ် မိတ်ဆွေမှန်ကို ပေါင်းသင်းရခြင်း၏ အကျိုးဖြစ်လေ၏။ အာလုံးလည်း မိတ်ဆွေစစ် မိတ်ဆွေမှန်ကို ပေါင်းသင်းတတ်၍ ဘ၀လမ်း ဖြောင့်တန်း အေးချမ်းပါစေဟု ဆန္ဒပြုလျက် -------။
0 comments:
Post a Comment
အသိဥာဏ်ဖြင့် ဘ၀ကို တည်ဆောက်ပါ။